Khawvel lawrkhawm

Papua New Guinea-ah magnitude 7.9-a nain lir nghing

Papua New Guinea-ah Inrinni khan magnitude 7.9-a nain lir a
nghing a, lirnghing vang hian Pacific bialah tsusami warning tih≠chhuah nghal a ni a, mahse a hnuah sut leh a ni.

Lirnghing hi an ram sanaa Inrinni zan dar 9.51-a thleng a ni a, New Ireland-a Taron khawchhak lam km 60-a hla, lei hnuai km 73.4-a thuk aṭanga inṭan a ni. Lirnghing hi km 187-a hlaa pawh hriat a ni a, mahse chhiatna liantham a thlen hriat a ni lo.

Indonesia-a thlawhtheihna tlaah mi 13 an thi

Indonesia air force thlawhtheihna, Hercules C-130 chu nimin zing khan an ram khawchhak lam, Papua province-ah a tla a, thlawhtheihnaa chuang pilot pathum leh sipai 10 te chu an vaiin an tih.

Air force hotu, Agus Supriatna chuan thlawhtheihna chetsual chhan chu khaw chin ṭhat loh vang nia an ngaih thu a sawi. Hercules hian Timika aṭangin Wamena-a dah tur ei tur a phur a, an kal tumna an thlen hma lawkin a tla ta a ni. Thlawhtheihna tlaa chuangte ruang chu Wamena khuaah lak nghal an ni.

Japan-ah avian flu leng vangin ar 210,000 suat tawh

Japan ramah arva pul hri, avian flu leng vangin hmarlam, Hokkaido-a ar vulhna hmuna ar 210,000 chu suat an ni.

Avian flu leng vang hian Japan-ah hian ṭum nga ar suat an ni tawh. Farm hrang hrangah bird flu hi hmuh a nih avangin a darh zel tur ven hna hi ngawrh taka thawh mek a ni. Niigata khuaah ar 550,000 suat an ni tawh a, Aomori bialah varak 23,000 suat an ni tawh bawk. Thuneitute chuan bird flu hmuhna bial aṭangin ar leh arsa aṭanga thil siam thawnchhuahte an khap a, kawngpuite pawh uluk taka ven an ni.