Venezuela-in pawisa thih hun tur sawn hla

Venezuela sorkar chuan an ram pawisa, bolivar 100 note a tih thih hnuah, pawisa note thar bolivar 500, 2,000 leh 20,000 note te a thlen mai theih loh avangin pawisa thi hi a hman theih hun a pawt sei.

Kar kalta Ningani khan Venezuela sorkar chuan bolivar 100 note tih thih a nih thu hi a puang a, a thleng theih hun pawh hun rei lo te chauh a hawng a ni. Pawisa note thar siam chu a thlen mai loh avangin ramchhungah sum indaih lohna nasa tak a thleng a, rampumah lungawi lohna lantir a nih avangin sorkar chuan pawisa thih hun tur hi a sawn hla leh ta a ni.

President Nicolas Maduro chuan pawisa note thar phurtu thlawhtheihna pathumte chu tihkhawtlai an nih thu sawiin, he hi rampawn lama sorkar hmalakna duh lo te thiltih vangah a puh. Pawisa note thar a thlen mai loh avangin mipuiten hasatna an tawk a, hei vang hian bolivar 100 note chu nakkum January 2 thleng hman theih a ni leh ang.

Venezuela hian sum lamah harsatna nasa tak a tawk a, a ram pawisa hlutna pawh a tlahniam chak hle. Bolivar 100 hi US pawisa cent 2 nen an intluk tawk a ni.

Bolivar 100 tih thih thu puan anih avangin mi tam tak chuan an mamawh leina tur nei loin an awm phah a, mipui 40% vel chu bank account nei lo an nih avangin electronic transaction an hmang thei lo bawk.

President Maduro chuan bolivar 100 note tih thih a ngaih chhan chu gang-teín sum tam tak an chheprelh vang niin a sawi. Gang ho hian pawisa faiin bolivar tluklehdingawn 300 chuang zet an chheprelh a, heng zinga a tam zawk chu bolivar 100 note a ni, a ti. Cucuta, Cartagena, Maicao leh Buaramanga khuaahte sum thurukna warehouse te an nei niin a sawi.