China leh Russia President-te inkawm

China president Xi Jinping leh Russia president Vladimir Putin-te chu Thawhṭanni khan an inkawm a, ram pahnihte inlalichinna lungphum tihngheh zual a, hmalam hun eng zawk an neih tur thu an sawi.

Hruaitu pahnihte hi Kyrgyzstan khawpui, Bishkek-a Shanghai Cooperation Organisation (SCO) summit neih kar lakah an inhmu a ni. Khawvel huap leh an bial huam chhunga an ngaihpawimawh thilte an sawi dun a ni.

Ni hnih awh SCO summit-ah ram hruaitu 10 chuang an tel a, Iran president Masoud Pezeshkian, India prime minister Narendra Modi leh Pakistan prime minister Shehbaz Sharif-te pawh an tel. Turkey president Recep Tayyip Erdogan chu 'dialogue partner' angin a tel ve bawk.

Putin leh Xi hian a hma pawhin CO summit-te hi khawvel thuneihna hmun hrang hranga insem tir an duhzia vawrh lar nan leh, khawthlang ramte laka lungrual taka an ṭanrual zia lantir nan an lo hmang tawh ṭhin a ni. Ukraine an beih avanga khawthlang ramte'n hrekna an siam avangin, Russia economy hi China lakah a innghat nasa tawh hle a ni.

Russia President hian summit hmangtu hruaitu dangte pawh a kawm dawn a, Iran president Pezeshkian nen pawh a hranpaa inbiakna neih an beisei bawk a ni. Russia leh Iran-te hi khawvela ram hrek nasat ber pawl an ni a, Russia-in Ukraine a run aṭang khan sipai leh sum leh pai lamah an inlaichinna an tinghet lehzual a, Iran hian Russia-in Ukraine a beih chhunzawmna atana hman tur drone-te a lo pe tawh bawk.