US-in Iran a beihnaah mi 11 an thi; Iran-in US base a bei let ve nghal

Iran chuan Thawhlehni khan US-in missile hmangin an ram chhim lam, Sikrik a bei niin a sawi a, inneih lawmna hmun pawh kap fuh telin mi panga an thi a, hliam 50 chuang an awm tih a tarlang. Hemi hnu nimin zing khan Iran chuan drone leh misile hmangin Jordan, Kuwait, Iraq leh Bahrain-a America sipai hmunte a kap let ve nghal bawk.

US Central Command (Centcom) chuan Islamic Revolutionary Guard Corps (IRGC)-in Strait of Hormuz-a sumdawnna lawngte leh he biala American sipaite beih a tum avanga beihpui thlak leh an nih thu a tarlang a, civil mi beih tumna erawh an nei lo tih an sawi.

IRGC chuan US chu na takin an chhang let dawn tih sawiin, US a chetdan avang chuan a la inchhir hle ang, a ti. Nimin zinga Jordan-a Aqab hmuna US marine base beihna tura ballistic a kah chhuah zinga 13 chu Jordan Armed Force chuan an lo dang niin an sawi. Iran beihna avang hian thi leh hliam an awm lo niin an tarlang bawk. Kuwait army pawhi an air defence-in Iran missile kah chhuah hi an lo dan thu an sawi ve bawk a; mahse mihring chenna bialah drone hmanga beihna avangin kangmei a chhuak tih an sawi. IRGC chuan Iraq-a US base an kap fuh tih sawiin, maintenance centre, warehouse leh hmanraw dangte an kah chhiat sak tih an tarlang. Bahrain-ah pawh hmun eng emaw zatah thil puak ri hriat a ni.

Thawhlehni tlaia US-in beihpui a thlak thar leh dawn khan, US president Donald Trump chuan Iran-in a bei let a nih chuan a aia na zawka an chet leh tur thu a sawi lawk. Tun ṭum hi July thla tawp lama beihpui an thlak hnuah US-in Iran ram chhung a beih thar lehna hmasa ber nia sawi a ni bawk.