Venezuela President hlui Maduro leh a nupuiin ruihhlo thubuai titawp turin dil

Venezuela president hlui Nicolás Maduro leh a nupui, Cilia Flores-te chuan Nilaini khan ram dang hruaitu leh 'first lady' an nih avanga hremna laka fihlimna, immunity) an neih thu sawiin an laka ruihhlo tawlhruk thubuai siam chu hnawl turin an dil.

Manhattan federal court-a lehkha an thehluhah, Maduro-a ukil-te chuan ram dang hruaitu chungah hetiang thubuai hi siam theih a nih loh avangin, judge pawhin he puhna hi a hnawl tur a ni tih an sawi.

Kum 63 mi, Maduro-a leh a nupui Cilia Flores (69) te hi January thla tir lama zan laia US sipaite'n Caracas-a an in aṭanga an man hnuah US-ah hruia nghal niin,Brooklyn tan-inah an la khung a ni. An nupa hian America-a ruihhlo tawlhluhnaah inhnamhnawiha puh an ni a, he thubuaiah hian thiam loh chantir an nih chuan dam chhung tang tura hrem theih an ni ang. US prosecutor-te chuan Maduro-a hian Venezuela-a dan kengkawhtute nena thurualin, ruihlo tawlhru lian tak takte puiin America-ah cocaine ton sang tam tak tawlh luh nan phiarrukna a kalpui a ni,an ti. Mahse, an puhna hi Maduro chuan a pha thung.