Myanmar President-in Vietnam a tlawh

Myanmar president Min Aung Hlaing chu ni thum cham turin nimin khan Vietnam-ah a zin. President atana ruat a nih hnuah ram dang a tlawh pasarihna ni.

Min Aung Hlaing hian nimin khan Vietnam defense ministry hnuaia awm, telecommunications leh defence corporation Viettel hotute a hmu nghal a ni. Viettel hian Myanmar-ah telecoms lam hna an thawk a, an defence unit hian drone leh ralthuam dangte an siam ṭhin. Nimina an inkawmnaah pawh heng chungchang hi an sawilan rin a ni. Nimin vek khan Min Aung Hlaing hian Vietnam hmarlam-a VinFast electric motor (EV) siamna factory a tlawh bawk. VinFast hian khawvel huapa an sumdawnna tihzauh nan Asia ramah hma a la meka, Indonesia leh India-ahte pawh motor assembly plant an din tawh.

Myanmar-a Vietnam ambassador, Nguyen Anh Duc chuan Myanmar President-in an ram a tlawh hma hian Myanmar leh Vietnam chuan politics leh sumdawnna lama an thawh dunna an tihchak a ngai tih a sawi. Ram pahnihte thawh dunnaah hian telecoms, electric motor (EV) siamna, lo neih leh nitin mamawh bungrua te chu ngaih pawimawh hmasak tur a ni tih a sawi bawk.

Min Aung Hlaing hian Vietnam hruaitu lu ber, To Lam a hmu dawn a, business forum-ah pawh a tel ang. Hruaitu pahnihte hian pawikhawihna beih letna leh sumdawnna tihhmasawnna chungchangah thawh dunna tur inremna pawh eng emaw zat an ziak dawn nia sawi a ni.