Italy-a NKorea palai chin hriat lohin awm

Italy rama North Korea ambassador Jo Song-gil chu chin hriat lohin a awm niin South Korea spy agency chuan a sawi. 

Jo Song-gil hi a nupui leh a fate nen Rome khawpuiah an khawsa a, North Korea-a high ranking official makpa a ni. Chin hriat loha a awm thu tarlan a nih hma hian Jo hian khawthlang ram pakhat, a hming tarlan loh hnenah inhumhimna a dil nia sawi a ni. 

NKorea palai zinga an ram tlanchhiatsan a, hmun danga humhimna dil hnuhnung ber chu London-a deputy ambassador Thae Yong-ho a ni. Thae hian kum 2016 khan a hna hi tlansanin, South Korea-ah a nupui fanaute nen an lut a ni. 

NKorea palai, ram danga thawkte hi an awmna ramah emaw, ram dangah emaw an tlanchhiat zui tur venna atan thuneitute chuan an chhungte ṭhenkhat chu NKorea-ah a hnutchhiah tir ṭhin.

Kum 48 mi Jo-a hi kum 2017 October thlaa Italy-in NKorea ambassor a hnawhchhuah hnuah acting ambassador angin dah zui a ni a, a term hi nikum November thla tawp khan a tawp a, mahse a term tawp hma November thla tir lam khan an awmna compound a chhuahsan nia sawi a ni. Hemi hnu hian biakpawh theih lohin a awm a, ram dangah tlanchhiat a tum nia ngaih a ni. 

Italy foreign ministry chuan Jo-a hnen aṭang hian inhumhim dilna engmah an dawn loh thu a sawi. Hetihlai hian SKorea chanchinbu JoongAng Ilbo chuan Jo leh a chhungte hi hmun him takah an awm mek niin a tarlang.