Egypt-a ruihhlo kaihhnawih thubuaiah mi 12 thi tura hremna pe

Egypt court chuan ruihhlo kaihhnawih thubuaiah mi 11 thiam loh chantirin, khaihlum turin hremna a pe. An zingah hian TV presenter Sarah Khalifa pawh a tel.

Sorkar chanchinbu al-Ahram chuan hremna pekte hi ruihlo siamna hmanrua lak luh a, hralh chhuah tumtu pawl, criminal gang pakhata tel an ni tih a tarlang. An kut aṭang hian phalna nei loa an kawl hmanraw hlauhawm leh silai mute pawh man a ni bawk.

Khalifa hi pawikhawihna thlenna tarlanna TV programme hmingthang tak ,'Mission Impossible' vangin a hmingthang hle. An puhna hi thu dik lo leh, inhnamhnawihna a neih loh thu a sawi, court sang zawkah khin let a tum. Thubuai siamsak zinga mi dang pakuate chu dam chhung lung-in tang tura hrem an ni a, mi pasarihte chu thiam chantir an ni thung.

Court chuan thla hmasa khan thutlukna hi a siam tawh a; mahse Egypt rama sakhaw lama thuneitu sang, Grand Mufti ngaihdan an lak hnuah an puang zar chauh a ni. Egypt dan hnuaiah thi tura hremna pek chungchangah hian sakhaw hruaitute ngaihdan hi lak ngei tura tih a ni.

Amnesty International report chuan kumin chhungin Egypt-ah thi tura hremna pek 492 awm tawhin, an zinga 23 tihhlum an ni tawh. Report chuan, "Thiam loh chantirte hi ruihlo tawlh leh pawngsual thubuaiahte a ni a; heng sualnate hiinternational law hnuaiah chuan chuan thi tura hremna pekna tha a tling lo a ni," tiin a tarlang.