Saudi Arabi-ah Jamal Khashoggi thah thubuai ngaihtuah ṭan

Turkey rama Saudi consulate-a Saudi journalist Jamal Khashoggi thah a nih chungchanga inhnamhnawiha puh mi 11-te chungthu chu Saudi khawpui, Riyadh-ah ngaihtuah ṭan a ni ta. 

Khashoggi hi nikum October 2 khan Istanbul-a Saudi consulate-a a kal chu thah a ni a, he thil thlengah hian Saudi Arabia chu inrawlhah puh a ni a, mahse hei hi a pha thung. Saudi Prince Mohammed pawhin he tualthahnah hian inhnamhnawihna a neih loh thu leh, he thil thleng hi ngaihdam theih loh pawikhawihna rapthlak tak a nih thu a sawi a ni. 

Turkey prosecutor-te chuan Khashoggi hi Saudi thuneituten an tirh agent-ten an that niin an sawi. Deputy public prosecutor Shalaan bin Rajih Shalaan chuan intelligence officer-in Khashoggi that tur hian thupek siamin, consulate chhungah hian tur hmanga jection hlum a ni tih a sawi. Hemi hnuah Khashoggi ruang hi chan sawmin, a taksa peng ṭhenkhat chu pawn lamah paih turin tualchhung mi an thurualpuite pek an ni tih a sawi. 

Turkey chuan he tualthahna hi an ram chhunga thleng a nih avangin tualthahnaa inhnamhnawiha puhte mi 18-te chu an ram ngeia an chungthu ngaihtuah a nih theih nan thawn turin Saudi a ngen a, mahse Saudi chuan a ngenna hi a pawmsak duh lo a ni. Saudi Arabia chuan he tualthah thubuai hi anmahniin chhuiin an ramah ngaihtuah a ni dawn tih a sawi. 

Hetihlai hian human rights group, Amnesty International chuan Khashoggi thah a nih dan hi chhui chiang turin UN a ngen a, Saudi thuneitute chhuichianna chu a rintlak tawk loh an hlauhthawn thu an sawi.