Indonesia-a tlang kang vangin airport khar, mi nuai 2 chuang tangkhang

Indonesia ramah tlang kang invawrh chhuak nasa tak avangin nimin khan airport khar chhunzawm leh a ni a, khualzin 2,70,000 vel an tlangkhang mek. Tlang kang thlen hnuah flight 2,000 chuang an thlawk chhuak thei tawh lo a ni.

Jakarta aṭanga m 150 vela hlaa awm, Anak Krakatau tlang chu kar liam ta Zirtawpni tlai khan puak ṭanin, lei leh vut sa tak a phuh chhuak a ni. Vut sa phuh chhuah hian Jakarta khawpui leh Lampung province thlengin a nghawng tel a ni. He tlang hi kar tawpah pawh khan a la che chhunzawm reng a ni.

Airport hnai vaiahte vut sa phuh chhuah hi hmuh an nih avangin, Jakara-a Soekarno-Hatta International airport leh airport dang pathum chu nizan thlen khan an khar chhunzawm. Tlang kang thlenna sikul-te pawh online class-a kalpui rih a ni. Lawng veivekte pawh tlang kang hian a tibuai tel bawk.

Indonesia-a Geological Agency chuan tlang hi a la puak chhuah leh mai a rinawm thu nimin khan a tarlang. Khawchin zirtu pawl, BMKGG chuan tlang kangin a vawrh chhuah vut sa hi Java lamah meter-a 6,000 a sang thlengin a leng a, Sumatar leh Banten province-ah meter 15,000 a sangte a leng thleng bawk.

Pathianni zan dar 8:30 vel aṭang khan tlang kang puak chhuak hi thleng tawh lo mah se, airport hrang hrangte chu khar a la ni. Transport minister Dudy Purwagandhi chuan khawchin a inthlak danglam reng avangin khar rih a ni tih a sawi. Airport thuneitute nen minute 30 dan zelah vut darh dan dinhmun chu an enfiah zel tih a sawi.