North Korea leh Russia-in an inkalpawhna tur lei hawng

Russia leh North Korea chuan ram pahnih thlunzawmna tur lei dawh hmasa ber an hawng ta. He kawng hian Tumen luipui kaltlangin, ram pahnih inkara bungrua phurh leh, mihring inkapawhna tur pawh a ti awlsam sawt dawn a ni.

NKorea state media chuan he lei hi mihring inkalpawhna, tourism, leh sumdawnna atana hman a nih tur thu a tarlang. Hetih lai hian Ukraine lamchuan he lei hi Russia-in Ukraine a beihnaa ralthuam leh sipai thiar luhna atana hman a ni zawk dawn niin a sawi ve thung.

Ukraine indona a chhuah hnuah Russia leh NKorea ram inlaichinna hi a ṭha chho hle a, induna hmuna Russia sipaite pui turin NKorea hian a sipai tam tham tak a lo tir tawh bawk a ni. Russia president Vladimir Putin leh North Korea hruaitu Kim Jong Un-a te chuan an ram beihna a thlen chuan inpuih tawn zel an lo tiam tawh a, hemi hnuah an ram thlunzawmna tur kawng pawimawh tak hi an hawng zui ta a ni.

Russian prime minister Mikhail Mishustin chuan he lei hi ṭhian nihna chhinchiahna thar tiin a sawi a, North Korea prime minister Pak Thae Song pawhin thil chhinchhiah tlak a nih thu a sawi ve bawk.

Lei siam tharah hian ni khatah lirthei 300 leh mihring 2,300 vel an kal tura chhut a ni. Satellite thlalak aṭanga lan danin lei hi km 1 vela thui niin, border checkpoint leh lirthei dahna hmunte pawh siam tel a ni. Ram pahnihte hi a hma chuan thlawhtheihna leh rel kawng kaltlang chauhin an inkalpawh ṭhin a ni.