Houthi helpawlin Saudi Arabia a beihnaah mi 73 an hliam

Yemen rama Iran thlawp, Houthi helpawlin Saudi Arabia-a civil mite chenna bial leh, energy site-te an beihnaah civil mi 73 an hliam. Hliam zingah hian hmeichhia leh naupangte pawh an tel tih Saudi chuan a sawi.

US leh Israel-in Iran laka beihpui an thlak hnuah, Houthi hian Iran thlawpna lantirin US thawhpui ramte a bei let ve nghal a ni. Yemen-a Saudi kaihhruai Arab ṭangrual pawl Major-General Turki al-Maliki chuan Houthi te hian Abha, Khamis Mushait, Jizan leh Najran province-a civilian leh economic site te an bei tih a sawi a, mahse an beih hun tak erawh a sawilang lo.

Al-Maliki chuan he beihna hi Saudi Arabia ram thuneihna bawhchhiatna leh ram chhunga mipuite leh khua leh tui chengte tana hlauhawm tak a nih a sawi. Ṭangrual pawl chuan he beihna hmachhawn turin hmalak ngaihna ngai zawng zawngah an lak tur thu a sawi bawk.

Saudi Ministry of Energy chuan nimin khan thuchhuah hran siamin, an ram chhim lama energy facility eng emaw zat chu beih a nih thu a sawi. Beihna thleng vang hian hmun ṭhenkhatah kangmei a chhuak tih a tarlang bawk. Facility ṭhenkhata chuan hna thawh pawh tihtawp lailawk a ni.

Houthi chuan Saudi Arabia beih a nih chungchangah sawi engmah a la nei lo thung. Mahse, a hmain Saudi chu Yemen laka a thiltih avanga hrem loha chhuah a nih loh tur thu an lo sawi tawh a ni.