WHO regional director aṭangin Sheikh Hasina fanu a bang

Bangladesh prime minister hlui, Sheikh Hasina fanu, Saima Wazed chu World Health Organisation (WHO) regional director for Southeast Asia a nihna aṭangin a bang.

Wazed hi WHO leh Bangladesh thuneituten thil dik tawk lo tia puhna kaihhnawihah chhui a ni. Member state-te chuan bang turin an nawr a ni. WHO chuan a thlaktu tur hi October thlaah a ruat beisei a ni. Southeast Asia Region-ah hian member ram 10 an awm a ni.

Kum 2025 khan Banglesh anti-corruption commission inbumna hmanga puhna chungchanga thubuai siamsak avangin Wazed hi hna aṭangin chawlh lak tir a lo ni tawh bawk. An puhna zingah hian regional director post a dilnaa a academic qualification-ah dik lotakin honorary doctorate angin a inziak nia sawina pawh a tel.

Kum 2023 August thla khan Bangladesh chuan WHO regional director for Southeast Asia atan Saima Wazed hi a nominate a, hemi kum November thlaah thlan tlin a ni. Kum 2025, February 1 khan a hna hi zawm ṭanin, kum nga term tur a ni a; mahse, a term a hman zawh hmain a bang ta a ni.

Wazed hi psychologist niin, Florida-a Barry University aṭangin clinical psychology-ah bachelor degree leh master degree a nei. WHO regional director for Southeast Asia a nih hma hian WHO director-general Tedros Adhanom Ghebreyesus tan mental health leh autism lamah advisor a ni a,WHO Expert Advisory Panel on Mental Health-ah member a ni bawk.