Nepal tuilianin a tichhiat din thar leh nan USD tld 4.78 ngai dawn

Nepal Foreign Ministry chuan an rama tuilian rapthlak thlengin thil tam tak a tihchhiatte din thar lehna turin USD tld 4.78 vel a ngai dawn niin a sawi.

Prime minister Balendra Shah chuan climate change in a nghawng, tuilian vanga chhiatna rapthlak tak an tawh chungchangah chu ram dangte hnenah pawh nasa zawka sawi chhuah a tum thu a tarlang.

August 26-a Nepal leh China inrina bula tuilian leh chirh tawlh nasa tak thleng vanga thi hi mi 1,400 chuang an tling a, chin hriat lohin mi 5,000 chuang an awm bawk.

PM Shah hi tun thla tawp lamah UN General Assembly-a thu sawi turi a kal dawn a, hei hi an rama chiatna thlen hnua ram pawn lama a zin chhuahna hmasa ber tur a ni. Foreign secretary Amrit Bahadur Rai chuan PM hian climate change chungchang leh, a nghawng zelin chhiatna nasa tak a thlen a, nunna leh thil nih tam tak chan a nih dante chu a sawi dawn ni, a ti.

Foreign Ministry thupuangtu, Lok Bahadur Chhetri chuan thil chhiate din t har lehna tura USD tld 4.78 vel an mamawh thu sawiin, heng zinga USD mtd 57.67 chu thla ruk chhunga hma lakna tur leh, a bak chu hun daih rei zawk tura hma lakna tur a ni tiha sawi.

UN-in a chhut danin, Nepal rama chhiatna thlenin chenna in a tihchhiat hlut zawng ringawt pawh USD mtd 158 vel a ni a; kawngpui leh lei, thla chinna ram leh thil dang a tichhaite a la chhut tel lo.Chhawmdawl ngai mi 84,000 te can USD mtd 50 mamawh ran a nih thu pawh a lo sawi tawh a ni.

Kar liam ta kartawp thleng khan Nepal-ah ruang 1,385 hmuh chhuah ni tawhin, chin hriat lohin mi 5,130 an la awm tih national disaster agency chuan a tarlang. China lamah thi 43 awmin, chin hriat lohin mi 519 an la awm mek bawk.