Trump-a'n Russia oil facility bei lo turin Ukraine a ngen

US president Donald Trump chuan Pathianni khan Ukraine president Volodymyr Zelenskyy chu Russia-in diesel a siam chhuah leh sem chhuahna hmun an beihna titawp turin a ngen. Russia oil facility an beihna chuan khawvel pumah oil lam indaih lohna a thlen niin sawi.

Ukraine hian thla eng emaw zat chu Russia oil leh gas industry bitumin, oil facility eng emaw zat a kap tawh a ni. Hei vang hian July thla aṭang khan Russia chuan ram pawn lama diesel thawn chhuah a khap phah a ni. Iran-in Strait of Hormuz-a oil phurtu lawngte kaltlang a khap hnuah, Russia-in diesel thawn chhuah a khap zui ve leh hian ram hrang hrangah oil supply lamah harsatna a thlen a ni. US-ah chuan kar liam ta kartawp khan diesel man pawh a san phah tawh bawk.

Trump chuan oil facility bei lo tura Zelenskyy a ngen thu hi sawiin, target dang tamtak a awm a ni, a ti. International Energy Agency-in report a tihchhuah tharah,August thla chhunga Gulf ramten diesel leh gasoil an thawn chhuah chu Iran war a thlen hma, February thla hma lama an thawn chhuah hmun lia ṭhena hmun hat vel chauh a ni tih a tarlang.

Hetih lai hian Ukraine chuan kum li chhung Russia-in an ram a beih tawhnaah, Russia oil industry-te chuan sum leh thil dang hmangin Russia sorkar chu an pui nasa hle tih a sawi. Hei vang hian oil industry hi bitumin, ballistic missile leh drone hmangtein Russia oil facility te chu an bei a ni.