UAE-in Bangladesh mi 5,000 te visa hnawlsak

United Arab Emirates (UAE) chuan an rama hnathawk, Bangladesh mi 5,000 dawn visa chu hriattir lawkna engmah awm loin a hnawlsak.

UAE-a hnathawka awm, Bangladesh mite hian an rama chawlh hmanga an haw hnua UAE an pan leh chu an visa pawmsak an lo ni tawh lo tih Bangladesh media-te chuan an tarlang. An harsatna tawh hi sorkarah thlenin, hna an thawh chhunzawm theih loh avangin chhawmdawlna pe turin an phut. An harsatna tawh chungchang hi Bangladesh sorkar chuan UAE thuneitute a sawipui mek a ni.

UAE-ah hian Bangladesh mi cheng nghet leh hnathawka awm hi mi nuai 12 vel an tling a, India leh Pakistan dawta ram dang mi awm tam ber an ni. Hnathawka lut zinga a tam zawk hi construction, manfucaturing leh transportation sector hnuaia thawk an ni. Hnathawkte avang hian Bangladesh pawhin UAE aṭangin sum a la lut hnem hle a, kum 2023-2024 inkar khan UAE-a Bangladesh mi hnathawkten sum an thawn haw hi USD tld 3.65 a tling pha a ni.