Malaysia lal-in PM hlui Najib house arrest-a awm zui phalsak

Malaysia lal, Sultan Ibrahim Iskandar chuan nimin khan an ram prime minister hlui, jail-a tang mek Najib Razak laka zahngaihna lantirin, a tan hmabak la awmte a in lamah house arrest-a a tlak a phalsak.

Pardons Board chuan kar liam ta khan Najib-a'n hremna an pekah zahngaihna lantir tura a ngenna a hnawlsak hnuah nimin khan board meeting neih leh thut niin, lal hian ngaihnathiamna a pe ta a ni. Lal hian house arrest hmanga zahngaihna lantirna hi a hmang ngai meuh lo a, hei vang hian lal thuneihna, dan leh thupek leh eiruk vanga thiam loh chantirte chunga ro rel danah pawh ram mipuiah inhnialna a chawh chhuah ngei rin a ni.

Legal Affairs Department chuan thuchhuah siamin, Sultan Ibrahim Iskandar chuan Pardons Board meeting-ah Najib laka thu delhkilh neia zahngaihna lantir hi a remti tih a sawi. Najib chu a inah pawn chhuak thei loin a tan hmabak la neih, kum 2028 August 23 thleng a awm phalsak a ni a, court-in riggit mtd 50 (USD mtd 12) chawi tura a tih chu a pe bawk tur a ni, a ti. Najib hian kaihhruaina siamte chu zawm vek tur a ni a, a zawm loh chuan ngaihhnathiamna hi tihtawp leh nghal a ni ang. Mahse, eng ang kaihhruaina nge an siam tih erawh an sawilang lo.

Kum 73 mi, Najib hi PM a nih laia sorkar hnuaia investment fund, 1Malaysia Development Berhad a dollar maktaduai tel tichingpen a, a mimal tana ruah puhin an ram court sang berah thiam loh chantir a ni Kum 2022 August thla khan man a ni a, tun thlengin jail-ah hren a la ni. A thuneihna hmang sual, dan bawhchhia leh sum tihchingpen thubuaiahte kum 12 tang tur leh, ringgit mtd 210 (USD mtd 51.5) chawi tura tih a ni a; mahse, kum 2024 January thla khan Pardons Board chuan a tan hun hi kum rukah titlemin, a pawisa chawi tur pawh ringgit mtd 50-ah a tihniam sak.