NKorea-in US kaihhruai drill neih sawisel

North Korea ram hotu, Kim Jong-un farnu, Kim Yo Jong chuan nimin khan US kaihhruaia military drill neih zawh tak chu na taka sawiselin, Korean Peninsula ah boruak a tisosang niin a sawi. An ramin nuclear ralthuam thuam chak an tumna chu a danglam dawn lo tih a sawi bawk.

State media KCNA-in Kim-i thusawi a tihchhuahah, Guam bula Pacific Vanguard 2026 naval exercise neih chungchang a sawi a ni. US kaihhruai drill neih hi 'war game' tia sawiin, US-in a thawhpui South Korea leh Japan te kaltlanga Asia-Pacific biala a sipaite thuam chak leh thuneihna pek a tumna a ni, a ti. North Korea chuan a chhan let dan tur a ngaihtuah a ngai a ni tiin, an ram himna tiderthawng leh an ram duh loh zawnga an che a nih chuan, an sipaite chu an theihna zawng zawng hmangin an che chhuak dawn tih a sawi.

Kim-i hian Ningani khan International Atomic Energy Agency conference-a NKorea nuclear ralthuam siam lo tura an phutna chungchang chu a lo hnawl tawh bawk. Nuclear ralthuam an neihte chu tihdanglam leh thlak theih a ni tawh lo a ni,a ti.

US Navy kaihhruaia multilateral exercise, Pacific Vanguard 2026, August 29 - September 10 chhunga neihah khan South Korea, Australia, Canada, New Zealand leh Japan an tel a ni.