US-in Saudi Arabia hnena F-35 jet 48 leitirna tur pawm

US State Department chuan Saudi Arabia hnenah F-35 stealth warplane 48 leitirna tur chu pawm a ni ta tih a sawi a, indo thlawhtheihna an leitir tur hi USD tld 24.3 hu a ni.

Saudi Arabia hian an ram venhimna lam thuam chakna turin hun rei tak chhung F-35 jet lei a lo tum tawh a ni. Mahse, Midle East biala he jet fighter hmang awmchhun, Israel official lamin Saudi hnena hralh tum chungchangah rilru fim tak put a ṭul thu leh, an lungnih vak loh thu an lantir avangin tihfel a ni mai lo. Hun rei tak an buaipui hnuah, US chuan hralh a remti thei ta ni.

State Department chuan Saudi hnena indo thlawhtheihna an hralh tur hian Saudi defence theihna tipungin, an ram venhimna kawngah a thuam chak dawn a, hei bakah US sipaite nena an thawh hona thlengin a tihṭhat phah thei dawn tih a tarlang.

US-a Saudi embassy chuan f-35 leina tur tihfel a ni ta chu lawmawm an tih thu sawiin, hei hian US leh Saudi ramten inlaichinna ṭha leh nghet tak an neih a tilang a ni, a ti. Security lama ram pahnihte thawh dunna chu a chak chho zel tih a sawi bawk.