Palestinian president-in US inrawlh a duh lo
United States (US) chuan Israel leh Palestinian-te inkara inremna siam a nih theihna tura a ruahmanna siam, Mideast peace plan chu tunkar hian puanzar a tum tih a sawi. Hetihlai hian Palestinian president Mahmoud Abbas chuan mideast peace siamna tura hmalaknaa US inrawlh a duh loh thu leh, a pawm theih loh thu a sawi.
Abbas chuan British foreign secretary Dominic Raab nena telephone-a an inbiaknaah hemi chungchang hi sawi chhukin, US chu Israel duhsak bikah a puh a ni. Abbas chuan Palestinian-te chuan two-state solution siamna turah an behchhanah 1967 border chu an la ring zel dawn tih a sawi bawk. Hemi hmang lo eng ruahmanna siam mah an pawm dawn lo tih a sawi.
Palestinian president thupuangtu, Nabil Abu Rudeinah chuan Arab leh Islamic ambassador-te biain, Washington-a US peace plan puanzarna inkhawma tel tura an sawmna chu hnar a, boycott turin a ngen. Abu Rudeinah chuan, "America ruahmanna siam hi Palestinian mipuite dikna chanvo paihbo a nihna tur phiarrukna leh, Palestinian state khawpui atna East Jerusalem hman tumna tihtawpna tur zawk a ni," a ti.