Israel-ah party thar dinhmun ṭha zel

Israel ramin October 27-a inthlanpui an neih tura kum khat chauha upa, party thar Yashar party dinhmun chu mipui ngaihdan lakah a che ṭha zel.

Media outlet hrang hrangten mipui ngaihdan an lakah, Yashar party hi mi tam takin rorellai, prime minister Benjamin Netanyahu kaihhruai Likud party aiin an dah sang zawk.

Seat 120 awmna, Israel parliament Knesset-ah Yashar hian seat 23 la thei turin an chhut a, hetih hian Likud party chuan seat 19-20 vel la turin an chhut bawk. Poll ṭhenkhatah chuan Yashar hian seat 25 a lak phak rin a ni bawk. Party mala sorkarna siam thei tur an awm rin a ni lo a, mahse Yashar party chu seat la hnem ber tura ngaih a ni. Party hruaitu, Netanyahu cabinet member hlui, Gadi Eisenkot chu Netanyahu tluk dawnin a lar tawh.

Yashar tih hi Hebrai ṭawnga thudik/rinawm tihna a ni , kum 2025 September thlaa Eisenkot-a din a ni. Eisenkot hi Israel Defence Forces Chief of Staff hlui a ni bakah, National Unity Knesset member a ni. October thlaa inthlanpi neih hunah sorkarna siam ngei an tum a, hemi atan hian party dangte pawh thawhpui dan kawng ngaihtuahin hma a la mek a ni.