UN General Assembly 2026 nei ṭan

US-a New York khawpuiah nimin aṭang khan United Nations General Assembly (UNGA) high-level general debate neih ṭan a ni a, September 28 thleng a awh ang.

General debate neihnaah hian UN member ram 130 vel an tel beisei a ni. Ni khatah session vawi hnih zel neih ni dawn a, Pathianniah erawh an chawl ang. Debate-a thu sawitute hian minute 15 zel hun an nei dawn nia sawi a ni.

UN secretary general Antonio Guterres chuan thu sawiin debate session hi ṭan a, annual report a pek bakah, UN hruaitu a nihna anga a thusawi tawpna hun pawh a hmang bawk ang. UNGA president Khalilur Rahman chuan debate hi a hawng zui a ni. Tihdan phungah chuan debate hawn hnuah Brazil ram aiawh chu thu sawi hmasa ber a ni ṭhin a, hei kkum 1955 aṭanga an lo kalpui tawh a ni. A pahnihnaah a thlentu ram, US aiawhin thu a sawi bawk ṭhin a, hemi hunah hian US president Donald Trump chuan a sawi dawn a ni.

Member ram hrang hrang aiawhten thu an sawi bakah Vatican City, Palestine state leh European Union hruaitute pawh thu sawi tura sawm tel an ni bawk.

UNGA hi Manhattan, New York-a UN headquarters-ah neih a ni ṭhin a, he complex hi kum 1949-1952 inkara sak niin UN ta a ni a, international territory-ah ngaih a ni. UNGA hi New York-ah hian nghah a ni ziah lo a, a tir lam kum ruk chhung chu khawpui hrang hrangah neih a ni. Kum 1952 aṭang khan New York-a UN headquarters-ah hian neih a ni ta a ni.

UN hotu, secretary-general thar tur chu UNGA ah hian ruat a ni dawn bawk. Secretary general ni lai, Guterres hian term hnihna hmang mekin December 31-ah a term hi a tawp tawh dawn a ni. Kum 1945-a UN din a nih aṭangin secretary-general hi pakua an awm tawh a, mipa vek an la ni. Hei vang hian member tam tak chuan hruaitu thar atan hian hmeichhia awm ve tawh se an duh thu an sawi. Hruaitu thar tura candidate pasarih la awm zingah hmeichhia pali an awm a ni.