Israel-in West Bank chungchanga France President thusawi dem

Israel chuan United Nations General Assembly-a France president Emmanuel Macron-a'n thu a sawinaah, West Bank-a Israel chet dan a sawi dan chungchang chu a dem thu a sawi.

President Macron hian kum 2023, October 7-a Hamas firfiakten Israel an beih avanga Israel-in Gaza Strip-a beihpui a thlak hnua mipuite dinhmun hrehawm tak chungchangte sawiin, West Bank-a Israel sipaite chet dante a sawi a ni.

Israel prime minister Benjamin Netanyahu office chuan thuchhuah siam nghalin, Emmanuel Macron thusawi dan chu thil awmze nei lo a ni, a ti. Hamas firfiakte chuan nitin deuhthaw Juda-te an bei a, Judai leh Samari ramah Israel civil mi tam tak an that tawh a ni,tiin West Bank chu a Bible hmingin a sawi. Juda-te ni pawimawh, Yom Kippur hma ni, September 20 khan West Bank-a Juda mi cheng chu kahhlum a nih thu a tarlang bawk.

West Bank-ah hian Israel mi cheng, kalfawr ṭhenkhat chuan Palestinian-te an bei ve fo bawk. United Nations chuan kumin kum chanve chhungin Israel mi chengten Palestinian mite pawikhawihna an thlen ṭum ruk a thleng tawh tih a sawi.

Israel-a US ambassador, Mike Huckabee pawhin France president Macron-a thusawi dan chu a dem thu a sawi ve bawk. Hamas te chu misual, America mi leh sa tam tak lo that tawhtu an ni tih a sawi a ni.