Coronavirus :Ram hrang hrangin China-a zin lo turin an mite ngen

China rama novel coronavirus, 2019-nCoV leng chuan zual lam a la pan zel a, nimin khan he hri leng vanga China rama thi awm zat chu mi 106 an tling chho a, a vei zat pawh Thawhṭanni-a mi 2,835 awm chu nimin khan 4,515-ah a pung tawh bawk. Hri leng hian zual lam a pan zel avangin ram hrang hrangin an mi leh sate chu China rama zin rih lo tura ngenna an tichhuak. China bakah ram dang 16-ah he hri hi hmuh a ni tawh a ni. 

Huban province-ah hri leng vanga thi mi 100 an tling. Hetihlai hian hri vei, enkawl dam tawh mi 60 chu damdawi-in aṭangin chhuahtir an ni tawh bawk. Japan chuan novel coronavirus hmuhchhuah ṭanna, Wuhan city-a Japan mi awmte hruaichhuahna turin nimin khan thlawhtheihna a tir a, US leh France pawhin thlawhtheihna tirh a tum bawk. UK pawhin an mite hruai haw dan tur a ngaihtuah mek a, hemi rual hian British mite chu an theih chuan China chhuahsan turin a ngen. Philippines chuan an rama China mi zinte hnena visas on arrival an pek ṭhin chu a titawp rih dawn tih a sawi.