Iran FM leh US palaiten meeting nei

New York,US-a khawpuia United Nations General Assembly neih karlakah, Iran foreign minister Abbas Araghchi chuan Middle East-a US special envoy Steve Witkoff leh president Donald Trump-a makpa, Jared Kushner-te a kawm.

Iran foreign ministry chuan inkawmna an neih theihna atana ram pahnih inkara palai hna thawktu, Qatar a tel tih a sawi.

Witkoff pawhin UNGA kar lakah palaite kaltlang Iran hruaitu nena inkawmna an neih thu hi X-ah a tarlang ve bawk a, inkawmna hlawk thlak tak an neih thu a sawi. Palai hna thawktute chuan theihtawp an chhuah chhunzawm zel tur thu a sawi bawk.

US president Trump pawhin Iran leh US palaiten meeting ṭha tak an neih thu leh, inbiakna pawh an neih chhunzawm leh thuai beisei a nih thu a tarlang. Inremna siam theih beiseina pawh a awm a ni, a ti.

Meeting hi darkar thum chhung neih a ni a, thla thum chhunga US-Iran in direct-a inbiakna an neih lehna hmasa ber a ni. A hmaa ram pahnih aiawhten hmaichhana inbiakna an neih chu June thlaah khan niin, Switzerland-ah US vice president JD Vance leh Iran official-te an inhmu a ni. New York-a an inbiaknaah hian Strait of Hormuz chungchang chu an sawi ber a ni leh a, Araghchi chuan he tui kawng hawng tura Iran thil phutte awi lang leh. An thil phut zingah hian US-in Iran lawng chawlh hmun a dansakte tihtawp leh, Iran thil neih hreksakte pek chhuahte a tel.

Iran senior official chuan US-in an ram laka sipai chakna a hmana tihtlem a, an ram economy hrekna tura a nawrna a tihnep chuan kar khat chhungin Strait hawn dan tur hi an ngaituah thei dawn niin a tarlang.