Germany leh Russia Foreign Minister-ten meeting nei

Germany leh Russia foreign minister-te chuan kar liam ta Inrinni khan New York khawpuia United Nations General Assembly neih karlakah meeting an nei.

Russia foreign minister Sergey Lavrov leh Germany foreign minister Johann Wadephul-te hian kum 2022-a Russia-in Ukraine a run hnua meeting an neihna hmasa ber a ni. Russia Foreign Ministry thupuangtu, Maria Zakharova chuan Germany lam ngenna avanga meeting hi nei an nih thu sawiin, UNGA-a Lavrov-a'n thu a sawi hmain hruaitu pahnihte hi an inhmu a ni.

Russia-Ukraine indona thlengah Germany hian Ukraine a thlawp avangin Russia nena an inkar pawh a ṭha lo chho hle. Thla liam taa Germany khawchhak lama Leipzig airport drone hmanga beiha nih avang khan an inkar boruak pawh a chhe zual hle a, an ram beituah hian Germany chuan Russia a puh a ni. Lavrov hian thu a sawinaah pawh Germany chu Ukraine puitu ram lian ber zinga mi a nih thu sawiin, Europe-ah pawh sipai chak ber neih tumin hma a la mek a ni, a ti.

Minister pahnihte hian an ram inlaichinna te, Ukraine war chungchangte an sawi dun tih official-te chuan an tarlang. Black Sea kaltlanga buh lam chi thawn chhuah a nih theihna atan inremna siam theih dan kawng ngaihtuah turin Wadephul chuan Lavrov a ngen. Black Sea-a lawng hrang hrangte him taka kaltir an nih theih dan tur chungchangah Russi chuan India, Egypt leh Turkey pawh inbiakna a neihpui tawh thu Lavrov chuan a sawi a, Ukrain pawh a hrana sawipui a ngai tih a tarlang. Black Sea-a lawng beituah Ukraine chu a puh a, mahse, Ukraine chuan an puhna hi a pha a, inremna siam tur pawhin a inhawng reng tih a sawi ve thung.