Bangkok-a district tinte disaster area-ah puang

Thailand khawpui, Bangkok-ah ruahsur nasa avangin khawpui chhung distric tin, district 50-te chu tuilian thlenna, flood disaster area-ah puan a ni.

Bangkok governor Chadchart Sittipunt chuan Inrinni khan khawpui pum chu disater area-a puanna hi a tichhuak a ni, ruahsur nasa tak chuan mipui himna a tiderthawng thei tih sawiin, public leh private property dinhmun pawh a him lo tih a sawi. khawpui chhung kawngpuite chu tuiin a chim nasa hle. Khawpui chhungah hian darkar 48 chhungin ruahtui 300 mm a tla hman a ni. Nimin khan sorkar chuan luikawr hnaiha chengte chu hmun sang lamah insaseng turin a chah.

Sipaite chuan harsatna tawkte chhawmdawl hna thawkin, awm lailawkna tur leh field kitchen-te an siam a ni. Bangkok Metropolitan Administration chuan awm lailawkna turin sikul building hrang hrangte a buatsaih a, khawpui chhunga chengte chu pawimawh tawp a nih loh chuan zin chhuak rih lo turin a ngen bawk.

Sorkar chuan nimin khan tuilian hian zual lam a pan tawh lo niin a sawi a; ruah a sur chhunzawm tawh lo a nih chuan khaw chhunga tui tling nasa tak ziaawm tur chuan ni hnih thum vel hun a la duh dawn tih a sawi.