Nawrh huaihawtten a sam tan luih sak

Boliva sorkar laka lungawi loa nawrh huaihawt eptu pawlten nimin piah khan, Bolivia-a Vinto khaw mayor Patricia Arce chu beiin, kalkawngah kelawngin an hnuk a, a sam an tansak bakah rawng senin an theh bawk.

Nawrh huaihawtte hian Vinto khuaa municipal headquarters aṭangin Patricia hi hnuk chhuakin, khawlaiah kelawngin kawng an zawh luih tir a, a nihna aṭanga bang turin nawrh huaihawtte hian an ti bawk. A hnuah police ten an chhan­chhuak nia sawi a ni.   

Bolivia president Evo Morales chuan nawrh huaihawtte thiltih hi a dem thu a tarlang a, a twitter lamah a party Move­ment for Socialism (MAS) chuan Patri­cia an thlawp tlat thu a tarlang. Vice President Alvaro Garcia pawhin a dem thu tarlangin, "Kan ram democracy-ah heng thil hi a thleng ngai lo. Hmeichhe khawihtute thil tih hi hmeichhe tihchhiatna leh zahpah lohna a ni," tiin a sawi. 

Bolivia Women Social Orga­nizations pawhin an hmei­chhiatpui chunga rawng taka nawrh huaihawtte chetna hi an dem thu an tarlang ve bawk. Sorkar laka lungawi lote nawrh avanga innek buainaah, Nilaini khan kum 20 mi zirlai pakhat a boral thu tarlan a ni. October 20 khan Bolivia presi­dent inthlanna chu neih a ni a, Morales a tlin avanga eptute nawrh­naa innek buainaah, mi pathum an thi tawh nia tarlang a ni. 

Nawrh huaihawtte nawrh chhan hi thla hluia an ram president inthlan kha felfai tawk loa an puh vang a ni. Inthlanah khan president nilai Evo Morales bawk thlan tlin leh a ni. Inthlan result hi khawih chingpen nia puhna a awm avangin darkar 24 chhung vote chhiar pawh chawlh lailawk a ni a, Morales hian vote tla 99.9% chhiar tawh aṭangin 47.1% a hmu hman.