Pakistan PM bang turin Rehman-a'n phut

Pakistan eptu hote leh Right-wing Jamiat Ulema-e-Islam Fazl (JUI-F) president Maulana Fazlur Rehman chuan an ram prime minister Imran Khan chu darkar 48 hmaa bang turin a phut tih Zirtawpni khan a sawi a, he a thil phut hi a thutawp a nih thu a sawi bawk.

Sorkar laka lungawi loin Jamiat Ulema-e-Islam pawlte hian ni sarih chhung atan 'Azadi March' an buatsaih a, nikuma prime minister inthlanna neih kha a felfai tawk lo tiin an sawisel a, hei vang hian Khan hi bang turin an phut a ni.

Rehman chuan sorkar mi pawimawhte nen engmah inbiakna an la neih loh thu a sawi. "I la lal chhunzawm duh a nih chuan inbiakna nei turin lo chhuak la, a nih loh pawhin kan dikna chanvo hi min pe let leh rawh," tiin nawr huaihawtta kalkhawmte hmaah Khan chungchang na takin a sawi.

JUI-F buatsaih sorkar duh lohna lantirna hi eptu party dang, Pakistan Muslim League-Nawaz (PML-N) leh Pakistan People Party (PPP) pawhin an thlawp.