Donald Trump USD mtd 2 chawi turin ti
Trump Foundation fund hman dik loh avangin, United States-a New York court judge chuan US president Donald Trump chu US dollar maktaduai 2 chawi turin a ti.
American lawyer Barbara UnderÂwood chuan charitable foundation thiltih hi dan kalh a nih thu leh, kum 2016 US president thlan dawn khan politics thilah a inhnamhnawih niin a sawi a, nikum June thla khan Manhattan-a New York Supreme Court-ah thubuai a thehlut.
President leh a fate, puitling pathum- Donald Trump Jr, Eric leh Ivanka-te chu New York-based charity ah board member atana dah khap turin Underwood chuan a phut a, Trump-a fate pathum hian dan loin Trump presidential campaign kha an thawhpui a, hei hian non-profit organisation-te zawm tura dan siam a palzut niin a sawi. Trump hian dan kalhin foundation hnenah hian foundation hminga presidential campaign pui tur leh, a sum neihte pawh campaign-na atan a hmang tur hian a ti niin a sawi bawk.
Trump Foundation fund laka thubuai thehluh a nih avang hian, nikum khan he foundation hi titawp lailawk a ni. New York court judge Saliann Scarpulla chuan he foundation thubuai a ngaituah hnuah, Trump chu pawisa chawi turin a ti zui ta a ni. An inkhinnaah Trump chuan thiam loh a chan avangin he foundation-a pawisa la awm US dollar maktaduai 1.7 chu NGO dangte pe turin court-in order a chhuah bawk.