Venezuela eptu hruaitu an rama a kir phutin kawng zawh

Venezuela eptu hruaitu, Nobel Peace Prize pawh lo dawng tawh, ram danga tlanchhe mek Maria Corina Machado chu an rama him taka a kir leh phutin Pathianni khan amah thlawptu mi tam takin kawng an zawh.

An khawpui, Caracas-a kawngzawh huaihawta telte chuan Machado party, Vente Venezuela party flag rawng, rawng pawl inbelin Venezuela flag te an vai bawk. Kawngzawh hi state khawpui hrang hrangah buatsaih a ni bawk.

Activist Flavio Valentini chuan an thiltih chu party leh politics chungchang ni loin, ram mipuiten an ram tana ṭha tura an tih a ni zawk tih a sawi. Pathianni vek khan Machado thawhpui, ram danga tlanchhe ve tho bawk an ramah a kir a, Machado kir ve theih hun tur erawh a hriat theih loh thu a sawi.

Machado hi thla kua chhung chu ram dangah a khawsa tawh a, Venezuela-ah kir a tum thu vawi tam tak sawi mah se, Venezuela sorkar chuan a lo dang zel niin eptu pawlte chuan an sawi. Mahse, hei hi sorkar lam chuan an pha thung.

Venezuela rama eptu pawl hruaitu zinga lar ber pawl, Machado hi president hlui Nicolas Maduro hnuaiah court chuan an ram president inthlan neih hnuhnung ber, kum 2024-ah khan chuh ve a khap. Mahse, a aiawha ding chuan inthlanah hian vote tla aṭangin hmun thuma ṭhena hmun hnih a hmu a, a chak nia sawi a ni. Mahse, Maduro chuan hei hi pawm loin,amah zawkin hnehna a chang tih a sawi a, official result sawiseltu eptu pawl mi leh sate beih zui niin hei vang hian Machado leh eptu hruaitu dang eng emaw zat an bihruk a ngaih phah a ni. Hun eng emaw chen a bihruk hnuah, nikum kumtawp lam khan Machado hi an rama democracy tungding tura a beihna avanga chawimawina hlan, Nobel Peace Prize dawng turin an ram hi a rukin a chhuahsan a ni. Hemi hnu hian Panama City, Panama-ah a tlanchhe zui a ni.

Kumin January thla khan US special force chuan Maduro leh a nupui chu Caracas-a an inah manin, US-ah an hruai nghal a ni. Hemi hnu hian Maduro thawhpui, Dele Rodriguez chuan ram hruaitu atan dah zui a ni. Ram hruaitu inthlak mah se, tun thlengin Machado hi an ramah a la kir thei lo.