SKorea-in thupha chawi turin Ukraine a phut

South Korea president office chuan Ukraine-in North Korea sipai pahnih a man, an kut a hlan chungchangah puangzar lo tura inremna an lo siam tawh a bawhchhiat avangin thupha chawi turin a phut.

Ukraine president Volodymyr Zelenskyy chuan Russia nena an indo meknaa Russia puitu, North Korea sipai pahnih an mante chu South Korea-ah an thawn tih a sawi a, sipaite hi man an harsa hle tih a sawi bawk.

Hemi hnu lawkah South Korea president Lee Jae Myung chuan Ukraine-in sipai thawn chungchanga inremna an siam bawhchhia a, mipui vantlang hriata a puanzar mai chu a hriatthiam loh thu leh, thil ṭha lo tak a nih thu X-ah a tarlang zui nghal a ni. Thil awmdan chu official-a sawifiah tur leh, thupha chawi turin Ukraine chu an phut a ni. Zelenskyy thachhang dawltu, Dmytro Lytvyn chuan chhang ve nghalin, Ukraine ram chuan thil zep ngai lo a ni tiin, a ruka sipaite ram kuta hlan chu thil harsa tak a nih thu a sawi. Thil nih dan dik tak chu kimchang takin an report mai niin a sawi.

North Korea hian Ukraine donaa Russia pui turin a sipai eng emaw zat a tir a ni. Sipai a tirh zinga pahnih chu nikum khan Ukraine sipaiten an man a, heng sipaite hian South Korea lamah nunphung pangngai taka nuna khawsak an duh niin SKorea lawmaker chuan a sawi tawh a ni.