Saudi Arabia-in an rama Israel mi zin phal lo

Saudi Arabia foreign minister Prince Faisal bin Farhan chuan an ram chhungah Israel mi leh sa te chu zin luh a theih loh thu a sawi.

Pathianni khan Israel minister of the Interior Aryeh Deri chuan Israel mi, muslim leh Juda-te chu sakhuana thil leh sumdawnna thila ni 90 chhung Saudi Arabia rama zin phalsak an ni tawh dawn tih a sawi a ni. A hma chuan Israel mite hi Saudi Arabia-a an zin dawn chuan Israel sorkar hnen aṭangin phalna an lak hmasak phawt a ngai ṭhin. 

Israel thutlukna siam thar hi Saudi Arabia foreign minister Prince Faisal chuan chhang letin, Israel passport neite chu an ramah zin a phal loh thu a sawi zui ve nghal a ni.Tun hma aṭang tawhin Saudi Arabia leh Israel ram te hi Palestinian ram chungchangah an ngaih­dan a lo in ang lo fo tawh ṭhin a, Saudi lam hian Palestinian ram chu anmah­nia an inrelbawl theih nan a thlawp tlat a ni. 

Israel hian Arab ram zingah Jordan leh Egypt ramte chauh hi a sangawi zawnpui ramte an ni a, thla hlui khan Arab ramte nena inkungkaihna ṭha zawk a neih theih nan Israel hian zawi muangin hma a la chho mek a ni. He a hma lakna kawngah hian foreign minister Prince Faisal chuan Israel chu an la rin zawh loh thu leh, Palestinian leh Israel inkara inbiakna chu dawhkana sawifel thuai a nih a beisei thu a sawi.