September 19-ah New Zealand inthlang dawn

New Zealand prime mi­nister Jacinda Ardern chuan nimin khan an ram inthlan­pui neih hun atan September 19 ruat a nih thu a puang.

Nimina cabinet meeting zawha press conference a neihnaah, Ardern chuan kum 2017-a inthlanna neih kha dik tak leh fel taka kalpui a nih thu sawiin, kumina inthlanna neih tur pawh hi dik tak leh fel taka kalpui theih a nih a besei thu a sawi. 

New Zealand parliament ṭhutkhawm hi kumin August 6-ah a tawpna neih tur a ni a, hemi hnu August thla vek ni 12-ah hian sorkar chu ṭhiah a ni ang. "Kan hma lawka kan ramin inthlan kan hma­chhawn leh turah hian, a hma ang bawka min thlawp leh turin mipuite chu ka ngen che u a, economic ngialnghet zawk kan neih theih nan leh kan ramin hma a sawn zel theih nan min thlawp chhunzawm zel turin ka sawm che u a ni," tiin Ardern chuan conference a neihnaah a sawi.

Christchurch khuaa mos­que pahnih beih vanga mi 50 zet kahhlum an nih hnuah khan, PM Ardern kaih­hruaina hnuaiah gun law siamṭhat chu a pass a ni. He dan siamṭhat hnuaiah hian semi-automatic leh military-style weapon lam chu khap an ni. Kumina New Zealand parliament inthlanna neih tur hi a vawi 52-na tur a ni a, House of Representatives seat 120 awmah hnehna chang tur chuan seat 61 lak a ngai a ni. New Zealand hian mixed-member proportional (MMP) voting system hmang­in an ram hruaitute an thlang chhuak ṭhin a ni.