France-a zirlaite nawrh huaihawtnaah tharum thawhna thleng

France rama khawpui hrang hranga zirlaiten classroom tawt lutuk, zirtirtu indaih lohna leh facility ṭha lo avanga lungawi lohna an lantirhnaah, Ningani khan tharum thawhna nasa tak a thleng. Zirlaite nawrh huaihawt vang hian nimin khan school 400 vel khar a ni.

Zirlai nuarte hian bawlhlawh bawmte halin, school-te an dang bawk. Education thuneitute chuan zirlai nuarte hian school principal eng emaw zat chu kutthlakin an aunawmah bawk niin an sawi. Nawrh huaihawt leh police-te innawr buainaah police officer 305 in hliam an tuar a, nuar zinga mi 1,949 chu man an ni bawk.

Interior Ministry chuan zirlaite nawrh huaihawt hian an ram chhung high secondar school 3,700 zinga 1,027 vel a nghawng buai tih an sawi. Paris region-ah pawh school 50 velah nawrh huaihawtte hian tharum thawhna thlenin, thil an tichhe bawk a ni.

Interior minister Laurent Nunez chuan nawrh huaihawtte chet dan chu a dem thu sawiin, thunun theih loha tharum thawhna thlenna a ni, a ti.

Prime minister Sebastien Lecornu office pawhin nawrh huaihawt chu tharum thawhna hmunah a chang a ni tiin, he thilah hian eptu lamte an inrawlh nia a lan thu intelligene service in an sawi tih a sawi chhawng. Mahse, hei hi eptu lam chuan sawiselin, eng intelligence service berin nge sawi tih sawichiang turin an phut thung.

Kar liam ta aṭang khan zirlaite hian an sikul pawn lamah chhan hrang hrang vangin lungawi lohna an lo lantir tawh a ni. Paris khawpui pawnah nawrh hi huaihawt ṭan a ni a, a hnuah khawpui hrang hrangah a darh a ni. Ningani khan nawrh an hauihawt hi university zirlaiten an zawm bawk a,university campus 30 chuang an dang.