Cambodia eptu hruaitu Kem Sokha chhuah zalen

Cambodia Supreme Court chuan kum hnih chuang eptu house arrest-a hren tawh, Cam­bo­dia National Rescue Party (CNRP) president, Kem Sokha chu nimin khan a chhuah zalen.

Kem sokha hi house arrest-a chhuah zalen ni mah se, politics thilah a inhnamhnawih leh an ram chhuahsan phalsak a ni lo. Kem hi CNRP dintute zinga mi a ni bawk. Kum 2017 khan CNRP hi rorellai, Cambodian People's Party kaihhruai sorkar paih­thlak tuma puhin ṭhiah a ni a, hetihlaia CNRP president kum 66 mi Kem chu Supreme Court chuan mahni ram sorkar laka helah puhin, a man zui a ni.  Kum 2018 September thla khan house arrest-a  hren zui leh a ni.

Eptu party lian ber ṭhiah a nih vang hian inthlanah pawh CPP candidate-te chu chuhtu awm loa thlan tlin niin National Assembly-ah seat awm zawng zawng 125 chu an la vek a ni. An party ṭhiahsak a nih hnu hian CNRP hruaitu eng emaw zat chu ram pawn lamah himna zawngin an tlanchhe bawk.

CNRP hruaitu Sam Rainsy pawh  Combodia Independence Day, November 9-a  Cambodia rama kir tura thutlukna a siam hnuah, Paris aṭangin Malaysia khawpui Kuala Lumpur Interna­tional Airport-a a kal zawk thu a facebook kaltlangin a tarlang.

Kem-a fanu Kem Monovi­thya chuan an ramah democracy tundin leh a duh thu leh, Prime Minister Hun Sen-a kaihhruai rorellai CPP-te chuan eptu hruaitu an man leh an rama lo haw ngam lote laka an chetna hlip a, an political right pe let leh se a duh thu a sawi. 

CNRP general secretary Saory Pon chuan Kem chhuah zalen a nih chhan hi ram hnufual deuhte hnena European Union-ina an pek ṭhin, Everything But Arms (EBAs) status an neih chu  hlihsak an hlauh vang niin a puh thung. 

Cambodia-a EU Ambassa­dor  Carmen Moreno chuan Combodia Foreign Affairs Minister Prak Sokhonn hnenah, kar kal ta khan EBAs chungchangah EU chuan Cambodia thawpui zel a duh thu, ministry thupuangtu Koy Kuong chuan a sawi.