Iran-in uranium enrichment 5%-in pun dawn
Iran chuan Inrinni khan uranium enrichment chu 5%-in a pun dawn tih a sawi.
Kum 2015-a siam Iran Nuclear Deal aṭanga nikuma US president Donald Trump a inhnuhdawh hnu khan Iran hian a khat tawkin uranium enrichment a tihpun dawn tih hi a sawi tawh a ni. Iran Nuclear Deal hnuaiah hian Iran hian uranium enrichment hi 3.67%-ah bituk chin a siamsak a, mahse US a inhnuhdawh avang hian Tehran chuan he inremna hi a zawm tawh dawn lo tih a lo sawi tawh bawk.
Atomic Energy Organisation of Iran thupuangtu Behrouz Kamalvandi chuan an mamawh dan chhutin uranium enrichment chu 5%-a an tihpun a ṭul thu hi a sawi a ni. Uranium enrichment hi nuclear power plant tana fuel siamna a ni a, ralthuam siamna atana pawimawh tak a ni. Tuna Iran-in a kalpui mek pawh hian an inremna siamsa hi a pel tawh a, mahse inremna an siam hmaa Iran-in a kalpui ai khan 20% zetin a la tlem thung.
An ram khawpui Tehran chhim lama awm Fordow plant-ah chuan Ningani liam ta aṭang khan Iran hian uranium enrichment hi a kalpui tawh a, Natanz-ah pawh a kalpui tawh bawk. Kumin July 1 khan Iran hian uranium enrichment hi bituk chi aiin kg 300-in a tisang dawn tih a sawi a, kar khat ral hnuah bituk hi an pel tawh tih an sawi. September 7 khan chak zawkin uranium enrichment hi a kalpui dawn thu a sawi leh bawk a ni.