Netanyahu-a'n Israel defence minister thar ruat

Israel prime minister Benjamin Netanyahu chuan New Right party hruaitu, Naftali Bennet chu defence minister atan a ruat thar. 

Kar kal ta Zirtawpni khan Jerusalem-a Prime Minister Office-a meeting an neihnaah Netanyahu hian defence minister atan hian a ruat a, hei hi Bennet pawhin a pawm nghal a ni. September 17-a inthlanpui an neih hnuaha Israel-ah hian sorkar thar a la ding thei lo. Netanyahu hi sorkar thar siam turin sawm ni mah se, ṭangrual sorkar hi a din thei lo tih a tichiang tawh. Hemi hnu hian Blue and White party hotu, Benny Gantz chu sorkar siam tura sawm a ni ve leh a, ani pawh hian a hlawhtling thei bik lo a ni. Hei vang hian Israel hian kumin chhunga a vawi thumna turin inthlanpui a hmachhawn leh a ngai maithei nia sawi a ni.