Brazil Court-in Eduardo Bolsonaro manna tur thupek tichhuak

Brazil Supreme Court chuan Ningani khan president hlui, Jair Bolsonaro fapa, Eduardo Bolsonaro manna tur thupek a tichhuak. Eduardo unaupa, Flavio Bolsanor chu an ram president thlanna neihah candidate niin, inthlan thawh hnihna hmachhawn turin a inbuatsaih mek a ni bawk.

June thla khan Supreme Court chuan kum 42 mi, Eduardo Bosolnaro hi a pa, Jair Bolsonaro thubuai ngaihtuahnaah US inrawlh tir tuma hma laa puhin thiam loh a lo chantir tawh a ni. A unaupa, Flavio leh US sorkar inkarah pawh palai hna thawktu ber niiin, May thlaa Flavio-a'n White House-a US president Donald Trump a hmuh ṭum pawhin a telpui a ni. Eduardo hi Texas, US-ah khawsain green card holder a ni. Manna tur thupek tichhuaktu, justice Alendre de Moraes hi kum 2025 September thlaa sorkar paithlak tuma puh chungchanga kum 27 tang tura Jair Bolsonaro hrem a nihnaah, a chungchang chhuinaa a hotu ber a ni. Moraes hian Eduardo Bolsonaro Brazilian passport chu cancel nghal tur leh, Brazil-a a kir ruala man nghal turin an ram police-te a hriattir a ni.