Palestinian inthlan neih hun tur sawn hla

Palestinian president Mahmoud Abbas chuan kum 20 dawn hnua Palestinian legislative inthlan neih hmasak ber tur chu kum khat dawnin a sawn hla leh. Inthlan hi nakkum Septmber 11-a neih turin a ti. Hemi rual hian kum 20 chuang president thlanna an neih tawh loh pawh neih nghal tura tih a ni bawk.

President Abbas hian Inrinni zinga Palestine Liberation Organization’s Executive Committee meeting neih hnuah inthlan sawn hlatna tur thupek hi a tichhuak a ni. He committee hi President hian a kaihruai a, East Jerusalem bakah West Bank leh Gaza Strip dinhmunte an thlir ho hnuah, inthlanna buatsaih mai tur a la theih lo nia an ngaih thu an sawi. Israel chuan inthlanna atana mamawh hmanrua leh, international observer-te Gaza Strip-ah luh a phalsak dawn lo niin an sawi.

Kum 2006 inthlana Hamas-in hnehna an chan hnuah, Palestinian ramah hian inthlan hi buatsaih a la ni leh lo. Israel leh khawthlang ramte chuan Hamas kaihhruai sorkar hi an pawm loin an boycott a, hei vang hian Palestinian politics lamah pawh buaina thlengin, a kum lehah Hamas-te hian Gaza Strip hi an thunun zui ta ni. Hemi hnu hian Gaza Strip leh West Bank-ah kum 20 chhung Palestinian pawl pahnih, Hamas bakah Abbas-a party, Fatah-ten a hranin ro an rel zui ta a ni.Hamas rorelna, West Bank-ah buaina leh tharum thawhna a thleng fo a, Israel-in West Bank-ah hian a ram luah chin leh outpost pawh a siam belh zel bawk.

Inthlan neih tur sawn hlat a nih thu puan a nih hma hian, inthlana chuh tum in register an la awm lo. Mahse, thawh ho tuma inbiakna nei erawh an awm a ni. Hamas, Islamic Jihad leh Fatah security chief hlui, Mohammed Dahlan kaihhruai pawlte chuan thawh ho an tum. Dahlan-a pawl thupuangtu, Dimitri Dilliani chuan eptu pawl lamte thawh ho an tum bakah, Fatah chhungah ngeiah Abbas hruaitu atana duh lohte an awm chhoh avangin Abbas in thlan neih tur hi a hlauthawng nin a sawi.

Mamoud Abbas hian kum 2005 aṭangin Palestinian Authority president dinhmun a chelh a, president leh legislative inthlan neih tur hi vawi tam tak a lo tikhawtlai tawh a ni.