North Korea-in ballistic missile enchhin

North Korea chuan nimin khan an ram khawchhak lam tuipuiah ballistic missile eng emaw zat a kap chhuak niin South Korea chuan a sawi.

South Korea Joint Chiefs of Staff (JCS) chuan missile-te hi North Korea khawpui, Pyongyang area aṭanga an ram huna zing dar 9:20 velah kah chhuah a ni tih sawiin, km 900 chuanga thui an thlawk tih a tarlang. Missile kah chhuah hi eng zat nge tih erawh a sawilang tel lo. South Korea President Office chuan North Korea hian United Nations Secuirty Council resolution bawhchhiain, vawi tam tak missile a enchhin tawh a ni tiin he thil hi titawp nghal tura an phut thu a tarlang. Kum 2006 kha UN chuan North Korea hi nuclear ralthuam leh ballistic missile siam leh enchhin titawp turin hrekna a lo siam tawh a ni. Nimina missile kah chhuah a nih hnu hian South Korea National Security Office chuan emergency meeting a ko nghal bawk.

Japan deputy defence minister Takashi Koyari pawhin missile pahnih chu minute 17 kar danah kah chhuah a ni a, economic zone pawn lam tuipuiah an tla tih a sawi ve bawk. Koyari chuan missile hmasa zawk hi km 220 vel thlawkin, a hnuhnung zawk hi km 910 chuanga thui a thlawk a ni, a ti.

JCS thupuangtu, Jang Do-young chuan North Korea missile kah chhuah hnuhnung ber chu South Korea-in hypersonic weapon a enchhin hnu lawk a nih avangin, an theihna lantir an tumna niin a sawi. Kar liam ta Ningani khan South Korea chuan hypersonic missile enchhinna hmasa ber a lo nei tawh a, he hun hi an president Lee Jae Myung pawhin a telpui a ni.

North Korea hian October 3 khan ballistic missile a lo enchhin tawh bawk a, state media KCNA chuan hypersonic missile a nih thu leh, an ram hotu Kim Jong-un pawhin a telpui thu a tarlang. Kumin chhungin ṭum 10 chuang missile an enchhin tawh a, September thla chhung bik khan ṭuk li an kap chhuak.