Sri Lanka court-in First Lady hlui bail dilna hnawlsak

Sri Lanka court chuan an ram first lady hlui, Shiranthi Rajapaksa-i'n eiruk thubuai kaihhnawiha Financial Crimes Investigation Division (FCID)-in a chhui meknaa anticipatory bail a dilna chu nimin khan a hnawlsak.

Maligakanda Magistrate Court chuan kum 73 mi, president hlui Mahinda Rajapaksa nupui, Shiranthi Rajapaksa bail dilna chu Magistrate in a ngaihtuah hnuah hnawl a nih thu a tichhuak. FCID hian Shiranthi Rajapaksa hi Siriliya Saviya account chungchangah a chhui mek a, October 6 khan court chuan officer-in-charge hnenah an thil chhui mek chungchangah report chu October 12-a theh lut turin a lo ti tawh a ni.

Shiranthi Rajapaksa hi Sri Lanka first lady ni tawh zingah eiruk thubuaia chhui leh hren hmasak ber a ni. Investigator-te chuan Colombo-a Lady Ridgeway Hospital for Children tana CT scanner leina turin LKR mtd 10 (USD 30,251) a khawn a, mahse khawl hi damdawi-inah pek a ni chuang lo niin an sawi. Public fund tihchingpen bakah, Public Property Act hnuaiah dan kalha chea puhna dangah thubuai siamsak a ni a, Kirukapone-a a chenna inah man a ni a, man a nih hnuah bail dilna hi a theh lut a ni.

Mahinda Rajapaksa hi kum 2005-2015 chhung khan Sri Lanka prsident a ni. A fapa upa ber, Namal Rajapaksa pawh eiruk thubuai siamsak ni bawkin, thubuai dangah hren mek a ni bawk.