China-in Paraguay leh Belize minister-te hrekna siam

China chuan Paraguay communication minister leh Belize foreign minister-te chu Taiwan nena inzawmna an neih kaihhnawihah hrekna a siam a, China hming tichhe turin Taiwan-in a duh dan anga a thunun theih an ni, a ti.

Paraguay leh Belize te hi Taiwan nena palai intirtawn ram 12 zingah an tel. Hetih lai hian China hian Taiwan hi a ram chin anga a chhal avangin a hrana ram dang nena inzawmna a neih hi a ngaimawhin, a pawmpui lo a ni. Taiwan nena inzamwna nei leh, Taiwan-a democracy sorkar thlawptu khawthlang ram politician eng emaw zat lakah hrekna hi a lo siam tawh bawk.

Paraguay minister of information and communication technologies, Gustavo Villate chuan Paraguay leh Taiwan hian project an neih dun mek avangin hetianga China a rawn chet hi an rin lawk sa a nih thu a sawi. China hrekna siam vang chuan an buai phah lo a, project hrang hrangte chu an thawh chhunzawm zel tur thu leh, a hma aia chak zawka an thawh dun tur thu a sawi.

Belize Foreign Ministry chuan China hrekna siam hi an pawm loh thu sawiin, foreign minister Francis Fonseca chuan minister a nihna anga a mawhphurhna ti a nihthu an sawi. An foreign policy a tihdanglam phah dawn loh thu leh, sorkar pawhin a mawhphurhna chu a hlen zel tur thu an tarlang. Belize hi Central America-a ram te tak te niin, an ram mipui zat hi nuai 4.41 an ni.

Taiwan Foreign Ministry chuan China chet dan chu na takin a sawisel a, ram dangte nena an inlaichinna chungchangah China chuan inrawlh tura dikna a neih loh thu a sawi. Inzawmna an neihpui ram dang minister-te hrekna a siam chu ram dang inrelbawlna leh foreign policy-a dik lo taka a inrawlhna lantirna a ni, a ti.

Belize foreign minister Fonseca hian September thla khan Belize ramah Taiwan foreign minister Lin Chia-lung a hmu a, June thla khan Paraguay minister Villate hian Taiwan deputy foregin minister Chen Ming-chi chu a hmu bawk a ni.