West Bank-ah Europe palaiten beih an tawk

West Bank tlawha kal, Europe palaite chu Inrinni khan he hmuna Israel mi cheng nia hriat, hmaituam ten an bei. He thil thleng hi Israel Defense Forces (IDF) chuan a dem thu sawiin, thil thlen dan chu an chhui chian mek thu a sawi.

Europe palaite hi Belgium, France, Poland leh Catholic Church aiawhte niin, Inrinni khan Ramallah bula Kristian khua, Taybeh an tlawh a ni. Palaite hian he khuaa cheng, Palestinian mite chu Israel mi khawsaten an bei fo nia sawi a nih avangin, thil awmdan a hmuna thlithlai tumin an kal a ni. An chuanna motor chu hmaituamten lo beiin, lungten an lo tawng a, France mayor chu kut an thlak nia sawi a ni bawk.

Belgium foreign minsiter Maxime Prevot chuan palaiten beih an tawk chu a dem thu sawiin, Israel sorkar chu pawikhawihtute hrem ngei turin a phut. 'He hmuna cheng Palestinian-te hian kut an tuar reng a ni, Israel mi khawsate hian journalist-te pawh an bei tel a ni," a ti. Iserael chuan Palestinian mi chengte himna chu a ngaihtuah tur a ni, a ti bawk.

Israel foreign minister Gideon Sa'ar chuan pawikhawihna thleng chu a dem thu sawiin, West Bank tlawhnaa tel ram ambassador-te chu foreign ministry chuan a biak zui nghal thu a sawi. Hemi rual hian palaite hian an tlawh tur hi IDF te hriattir hmasa lo a, an hriatpui lo chu pawi a tih thu a tarlang. IDF pawhin inbeihna thlenna hmunah hian IDF sipaite an awm loh thu an sawi bawk a ni.