Bolivia President Morales a bâng

Bolivia president Evo Morales chuan Pathianni khan president a nihna aṭanga a ban thu sawiin, Legislative Assembly-ah banna lehkha a thehlut nghal tih a sawi. 

Thla hmasaa Bolivia president thlanna neiha Morales thlan tlin leh a nih dan chuan sawisel a hlawh nasa hle. He inthlanah hian Morales hian a khingpui, amah hnaihtu ber Carlos Mesa lakah 10% point-a hma a hruai laiin, vote chhiar chu darkar 24 dawn chawlh lailawk a ni. Hei hian sawizui leh sawisel a hlawh hle a, thil fel lo awm leh vote tihchingpen nia sawiin eptu lamten lungawi lohna an lantir chhunzawm a ni. 

Eptute lamten lungawi lohna an lantir chhunzawm zel avangin tualchhung boruak a ṭha lo chho hle. Hei vang hian sipaite chuan Morales hi President a nihna aṭanga bang mai turin thurawn an pe. Armed forces commander Williams Laiman chuan, ""Ngunthluk taka kan ram awmdan kan thlithlai hnuah, Morales hi a nihna aṭanga bang turin kan ngen a ni. Kan rama muanna leh inremna a awm theih  nan leh, kan ram hi nghet taka kan din zel theih nan bang turin sipai lam chuan kan nawr ta mai a ni," a ti. Kaliman chuan an ram mipuite pawh tharum thawh zawnga che chhunzawm tawh lo turin a ngen bawk. 

Sipaiten an ngen hnuah, Morales chuan President a nihna aṭanga a ban thu hi TV kaltlangin a puang ta a ni. Morales chuan inthlan result-a lungawi lo, nawrh huaihawtten tharum thawhnate thlen a, a thawhpui leh an chhungte thlenga an beih tel avangin heng mite humhim leh puih nan hian a bang tih a sawi. Nawrh huaihawtte chu an unau, an hnampuite  an beih chu titawp a, an in an halsak te pawh tawpsan tawh turin a ngen. 

President aṭanga Morales a ban rual hian, a minister leh official ṭhen­khatte pawhin amah an thlawp zia tihlan nan an bang ve nghal bawk a, bang zingah hian vice president Alvaro Garcia Linera pawh a tel. Morales chuan Organization of Ame­rican States (OAS) in October 20-a inthlanna neih chu a felfai tawk loh avangin he inthlan result hi hnawl tur a ni, tia a sawi hnuah inthlan hi buatsaih ṭhat a ni dawn tih a sawi bawk a ni. Electoral board member-te pawh pawh thlak vek an ni dawn tih a sawi. 

Evo Morales hi Bolivia ram leilung fa, an ram president ni thei hmasa ber a ni a, kum 2006 aṭang khan President dinhmun hi a chelh tawh a ni. October thlaa President inthlan  an neih hma lawk khan Constitutional Court chuan president term chuh theih chin bithliah siam chu a hnawl a, hei hian mipuite a ti lungawi lo hle. 

Kum 2016-a mipui ngaihdan lakah khan president term neih theih zat bithliahna siam tihtawp tumna chu vote thlaktu tam berin an duh lo. Mahse Morale party hian mipuite thutlukna hi pawm loin, Constitutional Court lamah an pulut a, court hian bithliah chin siamna hi a lo paihsak a ni. Hei vang hian Morales pawhin a term lina turin inthlan hi a chuh leh theih phah a ni.