Australia: Ram kang vangin state pahnihah emergency puang

Australia khawchhak lama ram kang chuan ziaawm lam a la pan thei lo a, New South Wales (NSW)  leh Queensland-ah chuan nimin aṭang emergency an puang hial.

New South Wales (NSW) leh Queensland-ah hian mi pathum an thih tawh bakah mi sang chuang chu hmun him lamah sawnchhuah an ni tawh bawk. Official-te chuan vawiin hian an ram khawpui Sydney tan pawh a hlauhawm ṭan tawh dawn tih an sawi.

NSW bikah hian ram hectare 9,70,000 chuang a kang tawh a, in 150 a kang­­ chhe tawh a. Queens­land-ah hian in pakua a kang chhe tawh bawk. NSW Premier Gladys Berejiklian chuan nimin khan mipuite chu fimkhur tura chahin, a chhe ber tawk thut thei tura inralring turin a chah.

Vawiin hian ramkang vang hian temperature pawh 37C-ah a kaichhoh tawh rin a ni a, zual lam a pan zel a ni. NSW Rural Fire Ser­vice-te chuan hetiang renga ramkang hi a nasa zel a nih chuan in leh nunna chan an awm belh thei dawn tih an sawi. Queensland-ah hian hlauhawm a nep deuh a, chutih rual erawh chuan thuneitu lam chu an fimkhur hle thung. NSW hian emergency hi an puang hmasa a, an puan hnu lawk hian Queensland hian an puang zui ve nghal.

Vawiin aṭang hian NSW-a school-te chu khar an ni dawn. New Zealand lama kang ṭhelhtute pawhin Australia lam hi panin kang ṭhelh hi an pui ve bawk. Tualchhung mi eng emaw zatin kangṭhelh hi an pui ve bawk a ni.