Spain inthlanpui neihah rorellai party in seat an la hnem ber
Spain ram inthlanpui, Pathiannia neih takah rorellai Spanish Socialist Workers Party (PSOE) chuan seat a la hnem ber a, mahse Parliament-ah majority a nei pha lo.
PSOE hian seat 120 a la a, conservative Popular Party (PP) chuan seat 87 a la. Right-wing Vox Party chuan nasa taka hma sawnin seat 52 a la a, inthlan hmasaah khan seat 24 chauh a la pha a ni. Sorkar siam turin party hian Parliament seat 350 awmnaah hian seat 176 an neih phak a ngai a ni.
Pathiannia inthlan neih khan thla ruk chhunga inthlan an neih ṭum hnihna a ni. April thlaah khan inthlan hi an lo nei tawh bawk a, PSOE hi seat la hnem ber ni mah se party malin sorkarna an siam thei lo a, party dangte thawhpui tum mah se an inrem thei lo. Sorkar siam thei an awm tak loh vangin inthlan hi buatsaih ṭhat leh a ngai ta a ni.
Europe-a economy lian ram pangana, Spain hi prime minister hlui Mariona Rajoy paihthlak a nih hnu aṭangin politics lamah an la buai chhunzawm zel. Prime minister leh PSOE hotu Pedro Sanchez chuan inthlan result puan an ni hnuah an party-in seat la hnem ber an ni chu lawmawm a tih thu a sawi rualin, PSOE kaihhruai ṭangrual sorkar ngelnghet tak a awm theihna atan theihtawp an chhuah dawn tih a sawi. An ramin harsatna an tawh mek chinfel a nih theihna tura mawhphurhna an neihte chu party hrang hrangte chuan an hriat a beisei thu a sawi bawk.