Hong Kong a nawrh huaihawtten Subway station leh shopping mall tichhia

Hong Kong sorkarin thiam loh chantir tawhte mainland China-a thawn an nih theihna tur, extradition bill siam a tum duh lohna avanga nawrh huaihawtna kal zelah, Pathianni khan subway station leh shopping mall-te tihchhiat a ni.

Kawng hnuai inkalpawhna (subway station) tukverh leh ticket machine tihchhiat vang hian thuneitu lam chuan Sha Tin district-a subway station chu an khar nghal. Police-te pawh sub-way station ah venhim  hna thawk tura dah nghal an ni bawk. 

Tsuen Mun khuaah pawh nawrh huaihawtte hian shopping mall chu beiin, restaurant dawhkan leh mall chhunga tukverh ṭhenkhatte an tikeh nual. Helai hmuna buaina siamtute zinga mi ṭhenkhat chu police-te chuan an man bawk.

Hong Kong-ah hian November 24-ah District Council inthlanna neih a ni dawn a,  district 18-ah inthlanna neih a ni ang. He inthlanna neih turah hian democracy tundin a nih leh theih nan, nawrh huaihawtte hian felfai taka inthlanna neih hi an duh a ni.

Extradition bill hi hnawl a nih hnu pawhin nawrh huaihawtte hian sorkar laka thil phut hrang hrang an la neih avangin nawrh hi chhunzawm reng a la ni a, nawrh an huaihawt hi thla ruk a tling tawh. Nawrh huaihawtte hian zalen tak inthlanna felfai leh dik neih te, nawrh huaihawtte chunga rawng taka police an chet ṭhinna duh lohna te, extradition bill duhlohna an lantir vanga man tawkte chhuah zalen leh fugitive bill duh lohna an lantir avanga sorkarin nawrh huaihawtte "rioters" tia a koh sut turin sorkar lakah hian nawrh an la chhunzawm a ni.