Pakistan, Turkey, Qatar leh Indonesia ten inremna ziak

Qatar khawpui, Doha-ah Nilaini khan Pakistan, Turkey, Qatar leh Indonesia ramte chuan venhimna lama thawh dunna thuk zawk nei turin inremna an ziak.

Ram paliten inremna an ziah hi 'Badr Memorandum of Understanding' tih a ni a, Pakistan defence minister Khawaja Asif, Turkey defence minister Yasar Guler, Qatar deputy prime minister leh defence minister ni bawk Sheik Saud bin Abdulrahman leh Indonesia defence deputy minister Yusuf Jauhari ten an hming an ziak a ni.

August thla khan Pakistan, Saudi Arabia leh Turkey chuan thawh hona tur inremna, Makkah Joint Defence Agreement an lo ziak tawh bawk a, he inremna hnuaiah hian an zinga ram pakhat pawh beih an nih chuan ram pathumte beihna anga ngaih a nih tur thu tarlangin, an inpuihtawn zel tur thu an sawi a ni.

Qatar Defence Ministry chuan Doha-a inremna an ziah chu ram palite thawh hona thichakna leh, an inzawmna thuk zawk siamna tur a nih thu a sawi. He in remna hian defence lam hmanrua siamchhuah leh thuam chakna turte a huam tel a, technical defence training leh research lama thawh hona ṭha zawk tum a ni bawk tih a tarlang. Ram pali economy tan pawh he inremna hi a pawimawh hle tih a sawi.