Putin-a'n Ukraine leh US nena inbiakna chhunzawm remti

Russia president Vladimir Putin chuan US kaihhruaina hnuaia Ukraine nena inbiakna neih chu November thlaah chhunzawm leh a remti niin Russia chuan a sawi. Putin hian US special envoy, Steve Witkfoffin nen an inkawm hnuah thutlukna hi a siam a ni.

Putin leh Witkoff-te hi Nilaini khan Saint Petersburg-a Constantine Palace-ah an inhmu a, an meeting-ah hian US special envoy dang Jared Kushner chu virtual-in a tel ve bawk.

Witkoff chuan US kaihhruaina hnuaia Russia leh Ukraine nena inbiakna neih chhunzawm leh hi a rawt a, he hunah hian indo zawh hnua Ukraine leh Russia himna chungchang chu thlurbing a nih tur thu a sawi. Russia President-in inbiakna neih chhunzawm leh a rawtna hi Thawhlehni khan UKraine lam chuan an lo pawm tawh bawk a ni. Ram pathumten inremna zawnga inbiakna an neih hnuhnun ber chu Ferbuaryh thla kha a ni.

Russia chuan US leh Ukraine nena inbiakna hi Abu Dhabi a ni mai thei tih a sawi a, thla tharah neih tum a nih thu a sawi rualin a hun tur tak erawh a la sawilang lo. Hetih lai hian Putin hian Donald Trump leh China president Xi Jinping te chu meeting neihpui turin a sawm tih Russia official-te chuan an lo sawi tawh bawk.